Iran ta yi barazanar lalata ababen more rayuwa a yankin Gabas ta Tsakiya

Iran ta yi barazanar lalata ababen more rayuwa a yankin Gabas ta Tsakiya Gwamnatin Iran ta yi barazanar lalata dukkan kayayyakin more rayuwa na yankin Gabas ta Tsakiya idan Amurka ta kai wa matatun mai ko tashoshin wutar lantarkinta hari. Wallafawa ranar: Wannan gargaɗi ya fito ne daga bakin manyan jami'an sojin ƙasar biyo bayan musayar hare-hare da suka haɗa da lalata wata gada kusa da Tehran da Amurka ta yi. Gwamnatin Tehran ta jaddada cewa mashigar ruwa ta Hormuz mallakarta ce, kuma martanin da za ta bayar ba zai zama daidai da harin da aka kawo mata ba, a'a, zai kasance mafi muni da barna mara iyaka. Tuni dai Iran ta fara kai hare-haren makamai masu linzami kan kasashe irin su Kuwait, Bahrain, da Jordan inda ta ce tana fuskantar sansanonin sojin Amurka ne. Wannan taƙaddama ta jefa fargaba mai tsanani ga tsaron manyan matatun mai da cibiyoyin tace ruwan sha na ƙasashen yankin Gulf, lamarin da zai iya gurgunta tattalin arzikinsu. Kasashen duniya na kallon wannan dambarawa a matsayin barazana ga tsarin kasuwanci da jigilar makamashi na ƙasa da ƙasa idan yaƙin ya faɗaɗa. Masana na fargabar cewa wannan rikici zai iya haddasa hauhawar farashin man fetur a duniya da kuma rugujewar kokarin diflomasiyya na samar da zaman lafiya. Lamarin ya sanya dakarun ƙasashe da dama da ke yankin cikin shirin ko-ta-kwana saboda fargabar abin da ka iya zuwa nan gaba.